पुणे शहर पोलिसांच्या गुन्हे शाखेतील दरोडा व वाहनचोरी विरोधी पथक-१ यांनी घरफोडीच्या गुन्ह्यातील आरोपीला अटक करून गुन्ह्याचा यशस्वी छडा लावला आहे. या कारवाईत चोरीतील ११,५०० रुपयांचा मुद्देमाल जप्त करण्यात आला असून आरोपीला पुढील तपासासाठी अलंकार पोलीस ठाण्याच्या ताब्यात देण्यात आले आहे.
१९ जुलै २०२६ रोजी अलंकार पोलीस ठाण्यात गुन्हा क्रमांक १४८/२०२६ अंतर्गत भारतीय न्याय संहितेच्या कलम ३०५(अ), ३३१(३) आणि ३३१(४) अन्वये घरफोडीचा गुन्हा दाखल करण्यात आला होता. त्यानंतर दरोडा व वाहनचोरी विरोधी पथक-१ या गुन्ह्याचा समांतर तपास करत होते.
तपासादरम्यान पोलिसांना त्यांच्या गोपनीय बातमीदारामार्फत महत्त्वाची माहिती मिळाली. घरफोडी करणारा संशयित हा सोमनाथ भगवान मोरे (वय ३२) असून तो सध्या वसंतनगर, केळेवाडी, कोथरूड, पुणे येथे राहत असल्याची खात्रीशीर माहिती पोलिसांना मिळाली. त्यानुसार पथकाने तातडीने कारवाई करत संशयिताचा शोध घेऊन त्याला ताब्यात घेतले.
चौकशीदरम्यान आरोपीने १७ जुलै २०२६ रोजी पौड फाट्याजवळील विघ्नहर कॉम्प्लेक्समधील पहिल्या मजल्यावरील घरात चोरी केल्याची कबुली दिली. त्यानंतर पोलिसांनी आरोपीकडून ११,५०० रुपयांचा चोरीतील मुद्देमाल जप्त केला. या प्रकरणातील पुढील तपासासाठी आरोपीला अलंकार पोलीस ठाण्याच्या ताब्यात देण्यात आले आहे.
ही कारवाई अपर पोलीस आयुक्त (गुन्हे), पोलीस उपायुक्त (गुन्हे) आणि सहाय्यक पोलीस आयुक्त यांच्या मार्गदर्शनाखाली करण्यात आली. गुन्हे शाखा, दरोडा व वाहनचोरी विरोधी पथक-१ चे पोलीस निरीक्षक यांच्या नेतृत्वाखाली पोलीस उपनिरीक्षक जालिंदर फडतरे तसेच पोलीस अंमलदार अमित गडे आणि शिवाजी सातपुते यांनी या कारवाईत सहभाग घेतला.