राज्यसभेच्या 271व्या अधिवेशनाची सुरुवात; सभापती सी. पी. राधाकृष्णन यांचे शिस्त, कामकाज आणि AI भाषांतर सुविधेबाबत आवाहन.
राज्यसभेच्या 271व्या अधिवेशनाच्या प्रारंभी सभापती श्री सी. पी. राधाकृष्णन यांनी सभागृहाला संबोधित करत सर्व सदस्यांचे स्वागत केले. नव्याने निवडून आलेल्या सदस्यांचे विशेष स्वागत करत त्यांनी संपूर्ण सभागृहाच्या वतीने शुभेच्छा व्यक्त केल्या. तसेच, नव्या अधिवेशनासाठी सर्व सदस्यांना मनःपूर्वक शुभेच्छा दिल्या.
सभापतींनी सांगितले की, राज्यसभेला अर्थपूर्ण आणि दर्जेदार चर्चेची समृद्ध परंपरा लाभली आहे. हे अधिवेशनही त्याच परंपरेला साजेसे ठरेल, असा विश्वास त्यांनी व्यक्त केला. या अधिवेशनात एकूण 19 बैठका नियोजित असून, राष्ट्रीय महत्त्वाच्या विषयांवर चर्चा करून निर्णय घेण्यासाठी उपलब्ध असलेल्या या मौल्यवान वेळेचा सर्व सदस्यांनी प्रभावीपणे उपयोग करावा, असे त्यांनी आवाहन केले.
या अधिवेशनापासून राज्यसभा सचिवालयाने एक महत्त्वाची तांत्रिक सुविधा सुरू केली आहे. सदस्यांच्या आसनांवरील मल्टिमीडिया उपकरणांद्वारे नऊ भाषांमध्ये कृत्रिम बुद्धिमत्ता (AI) आधारित थेट समांतर भाषांतराची सुविधा उपलब्ध करून देण्यात आली आहे. ही सुविधा टप्प्याटप्प्याने संविधानाच्या आठव्या अनुसूचीतील सर्व 22 भाषांपर्यंत विस्तारली जाणार असल्याचे सभापतींनी सांगितले. या सुविधेत अधिक सुधारणा करण्यासाठी सदस्यांनी आपला अभिप्राय द्यावा, असेही त्यांनी नमूद केले.
सभापतींनी पुढे सांगितले की, या अधिवेशनात विधिमंडळाशी संबंधित तसेच विविध महत्त्वाच्या विषयांवरील चर्चेचा विस्तृत कार्यक्रम आहे. त्यामुळे सभागृहातील कामकाज वेळेत पूर्ण होण्यासाठी सर्व सदस्यांनी लक्ष केंद्रित करावे, असे त्यांनी आवाहन केले. प्रत्येक व्यत्ययामुळे देश आणि जनतेशी संबंधित महत्त्वाच्या विषयांवरील चर्चा पुढे ढकलली जाते, याकडेही त्यांनी लक्ष वेधले.
सभागृहातील सर्व पक्षांच्या सदस्यांना उद्देशून सभापतींनी राज्यसभेची प्रतिष्ठा, शिस्त आणि सभागृहाचे शिष्टाचार कायम राखण्याचे आवाहन केले. संसदीय लोकशाहीत मतभेद स्वाभाविक असले तरी ते सभागृहाच्या पवित्रतेचे जतन होईल अशा पद्धतीने व्यक्त केले जावेत, असे त्यांनी स्पष्ट केले. तसेच, कामकाजात अडथळे निर्माण होऊन सभागृहाच्या कार्यक्षमतेवर परिणाम होऊ नये, यासाठी सर्वांनी सहकार्य करावे, असेही त्यांनी म्हटले.
शेवटी, सभापती श्री सी. पी. राधाकृष्णन यांनी सर्व सदस्यांना फलदायी, विधायक आणि उद्देशपूर्ण अधिवेशनासाठी शुभेच्छा देत आपल्या उद्घाटनपर भाषणाचा समारोप केला.