पीयूष गोयल 13 ते 17 जुलैदरम्यान स्पेन, बेल्जियम आणि फिनलंड दौऱ्यावर; भारत-युरोप व्यापार व गुंतवणूक सहकार्याला नवी चालना.

 केंद्रीय वाणिज्य आणि उद्योग मंत्री पीयूष गोयल 13 ते 17 जुलै 2026 या कालावधीत स्पेन, बेल्जियम आणि फिनलंड या देशांच्या दौऱ्यावर जाणार आहेत. या दौऱ्यात ते भारतातील आघाडीच्या उद्योग प्रतिनिधींच्या उच्चस्तरीय शिष्टमंडळाचे नेतृत्व करणार आहेत. भारत आणि युरोपमधील व्यापार, गुंतवणूक, तंत्रज्ञान, नवोपक्रम आणि शाश्वत विकासाला अधिक बळ देणे हा या दौऱ्याचा मुख्य उद्देश आहे.

या शिष्टमंडळात प्रगत उत्पादन, स्वच्छ ऊर्जा, डिजिटल तंत्रज्ञान, रत्न व दागिने, अन्न प्रक्रिया, आरोग्यसेवा आणि डिझाइन क्षेत्रातील आघाडीच्या भारतीय कंपन्यांचा समावेश आहे.

13 जुलै रोजी स्पेनमध्ये पीयूष गोयल भारत-युरोपियन युनियन मुक्त व्यापार करार (FTA) संदर्भातील संधींवर चर्चा करणार आहेत. ते स्पेनचे अर्थ, व्यापार व उद्योग मंत्री कार्लोस कुएर्पो कॅबालेरो, उद्योग व पर्यटन मंत्री जोर्डी हेरेउ बोहेर आणि परराष्ट्र मंत्री जोसे मॅन्युएल अल्बारेस बुएनो यांची भेट घेणार आहेत. तसेच भारत-स्पेन बिझनेस राऊंडटेबलमध्ये सहभागी होऊन दोन्ही देशांतील उद्योगांमधील सहकार्य वाढविण्यावर भर देणार आहेत.

स्पेन चेंबर ऑफ कॉमर्स, CEOE आणि ICEX Spain Trade & Investment यांच्या संयुक्त विद्यमाने होणाऱ्या व्यावसायिक बैठकीत ऑटोमोबाईल, अक्षय ऊर्जा, रेल्वे, कृत्रिम बुद्धिमत्ता, सेमीकंडक्टर, अन्न प्रक्रिया आणि पर्यटन क्षेत्रातील संधींवर चर्चा होणार आहे.

14 आणि 15 जुलै रोजी बेल्जियममध्ये गोयल अँटवर्प बंदर आणि अँटवर्प वर्ल्ड डायमंड सेंटरला भेट देणार आहेत. तसेच थेल्स ग्रुप आणि सिलॉक्स ग्रुपच्या वरिष्ठ अधिकाऱ्यांशी बैठक घेणार आहेत. याशिवाय भारत-युरोपियन युनियन व्यापार व तंत्रज्ञान परिषद (TTC) मंत्रीस्तरीय बैठकीचे सह-अध्यक्षपद भूषवणार असून, व्यापार, तंत्रज्ञान, आर्थिक सुरक्षा आणि परकीय गुंतवणुकीशी संबंधित विषयांवर चर्चा करणार आहेत. बेल्जियमचे उपपंतप्रधान आणि युरोपियन आयोगातील वरिष्ठ अधिकाऱ्यांसोबतही त्यांची द्विपक्षीय चर्चा होणार आहे.

16 आणि 17 जुलै रोजी फिनलंडमध्ये पंतप्रधानांच्या निमंत्रणावरून ते दौरा करणार आहेत. फिनलंडचे आर्थिक व्यवहार मंत्री डॉ. साकारी पुइस्तो यांच्यासोबत बैठक होणार असून भारत-फिनलंड बिझनेस राऊंडटेबलमध्येही ते सहभागी होतील. तसेच CII आणि बिझनेस फिनलंड यांच्यात सामंजस्य करारावर स्वाक्षरी करण्यात येणार आहे.

या दौऱ्यात नोकिया, VTT रिसर्च सेंटर, KONE आणि केम्पी ग्रुपसारख्या अग्रगण्य संस्थांना भेट देऊन दूरसंचार, 6G संशोधन, स्मार्ट मोबिलिटी, प्रगत उत्पादन, ईव्ही चार्जिंग, औद्योगिक नवोपक्रम आणि शाश्वत तंत्रज्ञान क्षेत्रातील सहकार्याच्या संधींचा आढावा घेतला जाणार आहे.

भारत-युरोप आर्थिक सहकार्य अधिक मजबूत करणे, मुक्त व्यापार कराराला गती देणे, व्यापार आणि गुंतवणूक वाढविणे तसेच नव्या तंत्रज्ञान, स्वच्छ ऊर्जा आणि नवोपक्रम क्षेत्रात सहकार्य विस्तारण्याच्या दृष्टीने हा दौरा महत्त्वाचा मानला जात आहे.